* పెద్దపల్లి జిల్లా కలెక్టర్ కోయ శ్రీహర్ష*
* రానున్న ఆరు నెలల్లో పాఠశాలల మౌలిక వసతుల పనులు పూర్తి
* ప్రతి తల్లిదండ్రులు పేరెంట్–టీచర్ సమావేశాలకు తప్పనిసరిగా హాజరుకావాలి
* తుర్కల మద్దికుంట ఎంపీపీ ఎస్ పాఠశాలలో తల్లిదండ్రుల సమావేశంలో కలెక్టర్ పాల్గొనడం
పెద్దపల్లి: విద్యార్థుల విద్యా ప్రగతిలో తల్లిదండ్రుల భాగస్వామ్యం అత్యంత కీలకమని, తల్లిదండ్రులు ఉపాధ్యాయులతో సమన్వయంగా పనిచేస్తే ప్రభుత్వ పాఠశాలల విద్యార్థులు కార్పొరేట్ పాఠశాలల విద్యార్థుల కంటే మెరుగైన ప్రతిభ కనబరుస్తారని పెద్దపల్లి జిల్లా కలెక్టర్ కోయ శ్రీహర్ష పేర్కొన్నారు.
పెద్దపల్లి మండలంలోని తుర్కల మద్దికుంట ఎంపీపీ ఎస్ పాఠశాలలో శనివారం నిర్వహించిన తల్లిదండ్రుల సమావేశంలో ఆయన పాల్గొని, పాఠశాల మౌలిక వసతుల అభివృద్ధి, విద్యార్థుల విద్యా ప్రమాణాల పెంపు, తల్లిదండ్రుల బాధ్యతలపై పలు సూచనలు చేశారు.
ప్రభుత్వ పాఠశాలల్లో మౌలిక వసతుల కల్పనకు ప్రభుత్వం ప్రత్యేక ప్రాధాన్యత ఇస్తోందని కలెక్టర్ తెలిపారు. తుర్కల మద్దికుంట ఎంపీపీ ఎస్ పాఠశాలలో ప్రహరీ గోడ నిర్మాణం పూర్తైందని, జిల్లాలోని ప్రభుత్వ పాఠశాలలకు సంబంధించిన మౌలిక వసతుల పనులన్నింటినీ రానున్న ఆరు నెలల్లో పూర్తి చేసేలా చర్యలు తీసుకుంటున్నామని చెప్పారు. మౌలిక వసతులతో పాటు విద్యార్థుల విద్యా ప్రమాణాల పెంపుపైనా ప్రత్యేక దృష్టి సారిస్తున్నట్లు పేర్కొన్నారు.
ఈ లక్ష్య సాధనలో తల్లిదండ్రుల సహకారం ఎంతో అవసరమని, ప్రతి తల్లిదండ్రులు పేరెంట్–టీచర్ సమావేశాలకు తప్పనిసరిగా హాజరై పిల్లల చదువు, పురోగతి గురించి ఉపాధ్యాయులను అడిగి తెలుసుకోవాలని సూచించారు. విద్యార్థులు ప్రతిరోజూ క్రమం తప్పకుండా పాఠశాలకు హాజరయ్యేలా చూడాలని, ఏదైనా కారణంతో గైర్హాజరైతే వెంటనే ఉపాధ్యాయులకు సమాచారం అందించాలని కోరారు.
పిల్లలు ఇంటికి వచ్చిన తర్వాత వారితో కొంత సమయం గడుపుతూ పాఠశాలలో నేర్చుకున్న అంశాలు, హోంవర్క్ గురించి తెలుసుకోవాలని, ప్రతిరోజూ హోంవర్క్ పూర్తి చేసేలా పర్యవేక్షించాలని తల్లిదండ్రులకు సూచించారు. ఎప్పుడైనా పాఠశాలకు వచ్చి తమ పిల్లల విద్యా పురోగతి, ప్రవర్తనపై ఉపాధ్యాయులతో చర్చించవచ్చని తెలిపారు.
తల్లిదండ్రులు, ఉపాధ్యాయులు, జిల్లా యంత్రాంగం సమిష్టిగా పనిచేస్తే ప్రభుత్వ పాఠశాలలను మరింత బలోపేతం చేయడంతో పాటు విద్యార్థులను అన్ని రంగాల్లో ఉన్నత స్థాయికి తీసుకెళ్లవచ్చని కలెక్టర్ పేర్కొన్నారు. తల్లిదండ్రుల సంపూర్ణ సహకారం లభిస్తే ప్రభుత్వ పాఠశాలల విద్యార్థులు కార్పొరేట్ పాఠశాలల విద్యార్థుల కంటే మెరుగైన ఫలితాలు సాధిస్తారని విశ్వాసం వ్యక్తం చేశారు.
ఈ కార్యక్రమంలో డీఈవో శారద, జీసీడీవో కవిత, సర్పంచ్ రాజయ్య, ఉపసర్పంచ్ తిరుపతి, ప్రధానోపాధ్యాయురాలు మంజులత, ఉపాధ్యాయులు, తల్లిదండ్రులు పాల్గొన్నారు.
