– మ్యాచ్ అదనపు సమయంలో టొరెస్ మ్యాజిక్
– ఫైనల్లో 1-0తో డిఫెండింగ్ చాంపియన్పై విజయం
ఫుట్బాల్ ప్రపంచకప్ 2026లో స్పెయిన్ మరోసారి తన ఆధిపత్యాన్ని చాటుకుంది. ఆదివారం జరిగిన ఫైనల్లో డిఫెండింగ్ చాంపియన్ అర్జెంటీనాపై 1-0తో విజయం సాధించి 16 ఏళ్ల తర్వాత మరోసారి ప్రపంచ విజేతగా నిలిచింది. నిర్ణీత సమయంలో ఇరు జట్లు గోల్ చేయడంలో విఫలమవడంతో మ్యాచ్ అదనపు సమయానికి వెళ్లింది. అక్కడ 106వ నిమిషంలో ప్రత్యామ్నాయ ఆటగాడు ఫెర్రాన్ టొరెస్ చేసిన అద్భుత గోల్ స్పెయిన్కు చిరస్మరణీయ విజయాన్ని అందించింది.
మ్యాచ్ చివరి నిమిషాల్లో అర్జెంటీనా మిడ్ఫీల్డర్ ఎంజో ఫెర్నాండెజ్ రెండో పసుపు కార్డు పొందడంతో మైదానం వీడాల్సి వచ్చింది. దీంతో 10 మంది ఆటగాళ్లతోనే అర్జెంటీనా పోరాడాల్సి వచ్చింది. సంఖ్యాపరమైన ఆధిక్యాన్ని సమర్థంగా వినియోగించుకున్న స్పెయిన్ అదనపు సమయంలో టొరెస్ గోల్తో ముందంజ వేసి, ఆ ఆధిక్యాన్ని చివరి వరకు కాపాడుకుంది.
ఈ టోర్నీ తన చివరి ప్రపంచకప్గా భావిస్తున్న లియోనెల్ మెస్సీకి మరోసారి ట్రోఫీని ఎత్తే అవకాశం దక్కలేదు. ఫైనల్లో ఓటమి అనంతరం మెస్సీ తీవ్ర భావోద్వేగానికి లోనయ్యాడు. ప్రపంచ ఛాంపియన్గా వరుసగా రెండోసారి నిలవాలన్న అర్జెంటీనా ఆశలు కూడా స్పెయిన్ అడ్డుకట్ట వేసింది. ఈ ప్రపంచకప్లో స్పెయిన్ అత్యంత క్రమశిక్షణతో కూడిన రక్షణాత్మక ఆటను ప్రదర్శించింది. మొత్తం ఎనిమిది మ్యాచ్ల్లో కేవలం ఒకే ఒక్క గోల్ను మాత్రమే ప్రత్యర్థులకు ఇచ్చి ప్రపంచకప్ చరిత్రలో కొత్త రికార్డు నెలకొల్పింది. కీలక సమయాల్లో బంతిని నియంత్రిస్తూ ప్రత్యర్థికి అవకాశాలు ఇవ్వకుండా ఆడిన తీరు జట్టుకు టైటిల్ను అందించింది.
2023లో మహిళల ప్రపంచకప్ను గెలిచిన స్పెయిన్, ఇప్పుడు పురుషుల ప్రపంచకప్ను కూడా సొంతం చేసుకోవడంతో ఒకేసారి రెండు ప్రపంచకప్లను కలిగి ఉన్న తొలి దేశంగా చరిత్ర సృష్టించింది. విజయం అనంతరం మాడ్రిడ్తో పాటు దేశవ్యాప్తంగా అభిమానులు భారీ ఎత్తున సంబరాలు జరుపుకున్నారు. ఫైనల్ విజిల్ అనంతరం ఇరు జట్ల ఆటగాళ్లు, కోచ్ల మధ్య స్వల్ప వాగ్వాదం, తోపులాట చోటుచేసుకుంది. అనంతరం క్రీడాస్ఫూర్తిని చాటుతూ స్పెయిన్ ఆటగాళ్లు అర్జెంటీనా జట్టుకు ‘గార్డ్ ఆఫ్ ఆనర్’ ఇచ్చి రన్నరప్ పతకాలు స్వీకరించే వేదిక వరకు సాగనంపడం అభిమానులను ఆకట్టుకుంది.
