* తెలంగాణలో అతిపెద్ద AI రెడీనెస్ కార్యక్రమానికి శ్రీకారం చుట్టిన మంత్రి మహ్మద్ అజహరుద్దీన్
హైదరాబాద్,ప్రజానావ బ్యూరో: భవిష్యత్ డిజిటల్ ఆర్థిక వ్యవస్థకు మైనారిటీ విద్యార్థులను సిద్ధం చేసే లక్ష్యంతో తెలంగాణ ప్రభుత్వం రాష్ట్రవ్యాప్తంగా 80 వేల మంది విద్యార్థులకు కృత్రిమ మేధస్సు (ఏఐ) శిక్షణ అందించే భారీ కార్యక్రమాన్ని ప్రారంభించింది. మైనారిటీల సంక్షేమం, ప్రభుత్వ రంగ సంస్థల శాఖ మంత్రి మహ్మద్ అజహరుద్దీన్ ఈ కార్యక్రమాన్ని ప్రారంభించారు.
ముఖ్యమంత్రి రేవంత్ రెడ్డి నాయకత్వంలో తెలంగాణ మైనారిటీస్ రెసిడెన్షియల్ ఎడ్యుకేషనల్ ఇన్స్టిట్యూషన్స్ సొసైటీ (TMREIS) పరిధిలోని 205 పాఠశాలలు, కళాశాలల్లో చదువుతున్న సుమారు 80 వేల మంది విద్యార్థులకు **AI రెడీనెస్ అండ్ డిజిటల్ సేఫ్టీ ప్రోగ్రామ్** అమలు చేయనున్నారు. ఈ కార్యక్రమాన్ని TMREIS, **MASK NextGen**, **డాక్సా కన్సల్టింగ్ ప్రైవేట్ లిమిటెడ్ (DCPL)** సంయుక్తంగా నిర్వహించనున్నాయి. రాష్ట్రవ్యాప్తంగా అమలు బాధ్యతలను డాక్సా కన్సల్టింగ్కు అప్పగించారు.
ఆగస్టు 15, 2026 నుంచి ప్రారంభమయ్యే ఈ కార్యక్రమాన్ని ప్రభుత్వం, విద్యార్థులపై ఎలాంటి ఆర్థిక భారం లేకుండా పూర్తిగా ఉచితంగా అమలు చేయనున్నట్లు అధికారులు తెలిపారు.
ఈ సందర్భంగా మంత్రి మహ్మద్ అజహరుద్దీన్ మాట్లాడుతూ, కృత్రిమ మేధస్సు ప్రపంచాన్ని వేగంగా మార్చేస్తోందని, అలాంటి సాంకేతిక విప్లవంలో తెలంగాణ మైనారిటీ విద్యార్థులు వెనుకబడకుండా ఉండాలనే ఉద్దేశంతో ఈ కార్యక్రమాన్ని చేపట్టినట్లు చెప్పారు. విద్యార్థులకు భవిష్యత్ ఉద్యోగాలకు అవసరమైన నైపుణ్యాలు, డిజిటల్ అవగాహన, విమర్శనాత్మక ఆలోచన, నాయకత్వ లక్షణాలు పెంపొందించడమే ఈ కార్యక్రమం ప్రధాన లక్ష్యమని పేర్కొన్నారు.
MASK NextGenతో మూడు సంవత్సరాల భాగస్వామ్య ఒప్పందం కుదుర్చుకున్నామని మంత్రి తెలిపారు. ఈ కార్యక్రమం ద్వారా విద్యార్థులు కేవలం ఏఐ పరిజ్ఞానం మాత్రమే కాకుండా, డిజిటల్ భద్రత, బాధ్యతాయుత సాంకేతిక వినియోగంపై కూడా అవగాహన పెంపొందించుకుంటారని చెప్పారు. “ఏఐ ఇప్పుడు భవిష్యత్తు కాదు.. ప్రస్తుత వాస్తవం. మన పిల్లలు ఈ రంగంలో నాయకులుగా ఎదిగేలా సిద్ధం చేయడం ప్రభుత్వ బాధ్యత” అని మంత్రి అన్నారు.
మహిళా సాధికారతకు తెలంగాణ ప్రభుత్వం అత్యంత ప్రాధాన్యం ఇస్తోందని పేర్కొన్న మంత్రి, బాలికలు అత్యాధునిక సాంకేతిక విద్యను అభ్యసించి ఆత్మవిశ్వాసంతో అన్ని రంగాల్లో నాయకత్వం వహించే స్థాయికి ఎదగాలని ఆకాంక్షించారు.
ఈ శిక్షణను గేమిఫైడ్, స్వీయ-అభ్యాస డిజిటల్ లెర్నింగ్ ప్లాట్ఫారమ్ ద్వారా అందించనున్నారు. ఇందులో కృత్రిమ మేధస్సు, డిజిటల్ భద్రత, ఇంగ్లీష్ కమ్యూనికేషన్, నాయకత్వ లక్షణాలు, విమర్శనాత్మక ఆలోచన, ఆవిష్కరణలపై ఇంటరాక్టివ్ మాడ్యూల్స్ అందుబాటులో ఉంటాయి.
ఈ కార్యక్రమాన్ని విజయవంతం చేయడంలో కీలక పాత్ర పోషించిన MASK NextGen వ్యవస్థాపకురాలు, సీఈఓ అవ్ని త్రివేది, డాక్సా కన్సల్టింగ్ ప్రైవేట్ లిమిటెడ్ ప్రతినిధి జోసెఫ్ క్రిస్టోఫర్, TMREIS కార్యదర్శి బి. షఫియుల్లా, అధ్యక్షుడు ఫహీమ్ ఖురేషీల సేవలను మంత్రి ప్రత్యేకంగా అభినందించారు.
దేశంలో మైనారిటీ విద్యార్థుల కోసం చేపడుతున్న అతిపెద్ద ఏఐ విద్యా కార్యక్రమాల్లో ఇదొకటిగా నిలవనుండగా, తెలంగాణను సాంకేతికత, ఆవిష్కరణలు, సమగ్ర అభివృద్ధిలో అగ్రగామి రాష్ట్రంగా నిలబెట్టే మరో కీలక అడుగుగా ఈ కార్యక్రమాన్ని ప్రభుత్వం అభివర్ణించింది.
