* 21వ శతాబ్దపు నైపుణ్యాలు, ఏఐ-ఐసీటీ ఆధారిత బోధనపై ప్రత్యేక దృష్టి పెట్టాలని సూచన**
పెద్దపల్లి: విద్యార్థుల్లో అభ్యసన సామర్థ్యాలను పెంపొందించేందుకు ఉపాధ్యాయులు ప్రత్యేక కృషి చేయాలని, ఆధునిక సాంకేతిక పరిజ్ఞానాన్ని వినియోగిస్తూ నాణ్యమైన విద్యాబోధన అందించాలని పెద్దపల్లి జిల్లా కలెక్టర్ కోయ శ్రీహర్ష సూచించారు.
బుధవారం పెద్దపల్లి జిల్లా కేంద్రంలోని జిల్లా పరిషత్ బాలుర ఉన్నత పాఠశాలలో నిర్వహిస్తున్న మూడు రోజుల **ఇంటిగ్రేటెడ్ ఇన్-సర్వీస్ ఫిజికల్ సైన్స్ టీచర్స్ ట్రైనింగ్** కార్యక్రమాన్ని కలెక్టర్ సందర్శించారు. అంతర్గాం, పాలకుర్తి, శ్రీరాంపూర్, ఓదెల, పెద్దపల్లి మండలాలకు చెందిన భౌతిక శాస్త్ర ఉపాధ్యాయుల కోసం ఏర్పాటు చేసిన శిక్షణను పరిశీలించి వారితో సమావేశమయ్యారు.
ఈ సందర్భంగా కలెక్టర్ మాట్లాడుతూ, ప్రతి ఉపాధ్యాయుడు తన బోధనా నైపుణ్యాలను నిరంతరం మెరుగుపరుచుకుంటూ ప్రతి విద్యార్థి నిర్దేశిత “లెర్నింగ్ అవుట్కమ్స్” సాధించేలా కృషి చేయాలని సూచించారు. ముఖ్యంగా “రీడింగ్, రైటింగ్, క్రిటికల్ థింకింగ్, ప్రాబ్లమ్ సాల్వింగ్, కమ్యూనికేషన్ స్కిల్స్” వంటి 21వ శతాబ్దపు నైపుణ్యాలను విద్యార్థుల్లో పెంపొందించే విధంగా బోధన కొనసాగించాలని తెలిపారు.
అభ్యసనలో వెనుకబడిన విద్యార్థులను గుర్తించి వారికి రిమీడియల్ తరగతులు నిర్వహించాలని, ప్రతి విద్యార్థి అన్ని సబ్జెక్టుల్లో అవసరమైన అభ్యసన సామర్థ్యాలను సాధించేలా ఉపాధ్యాయులు కార్యాచరణ రూపొందించి అమలు చేయాలని సూచించారు.
శిక్షణలో భాగంగా కృత్రిమ మేధస్సు (ఏఐ) వినియోగంపై ఉపాధ్యాయులకు అవగాహన కల్పించారు. భౌతిక శాస్త్ర బోధనలో ఏఐ టూల్స్ను ఉపయోగించి లెసన్ ప్లాన్లు రూపొందించడం, ప్రశ్నాపత్రాల తయారీ, బోధనను మరింత సమర్థవంతంగా నిర్వహించే విధానాలపై రిసోర్స్ పర్సన్లు శిక్షణ ఇచ్చారు.
అదేవిధంగా ఐసీటీ ఆధారిత బోధనలో భాగంగా “దీక్ష యాప్”, “శిక్షా ఫౌండేషన్” రూపొందించిన “శిక్ష కో-పైలట్” వేదిక వినియోగం, బొమ్మలు, ఆటల ఆధారిత సైన్స్ బోధన, పాఠ్యపుస్తకాల సమర్థ వినియోగం, అభ్యాస దీపికలు, ప్రభుత్వం అందించే వర్క్బుక్లు, ప్రయోగాత్మక బోధనలో ల్యాబొరేటరీ మాన్యువల్ వినియోగంపై శిక్షణ అందించారు.
శిక్షణలో పాల్గొన్న ఉపాధ్యాయులతో కలెక్టర్ ప్రత్యక్షంగా ముచ్చటించి, శిక్షణలో నేర్చుకున్న అంశాలను పాఠశాలల్లో సమర్థవంతంగా అమలు చేయాలని సూచించారు. కృత్యాధారిత (యాక్టివిటీ బేస్డ్) బోధన ద్వారా విద్యార్థుల్లో అభ్యసన నైపుణ్యాలు మరింత మెరుగుపడతాయని తెలిపారు. గత ఏడాది శిక్షణలోని అంశాలను కూడా పునశ్చరణ చేసుకుని, వాటిని తరగతి గదుల్లో అమలు చేసి విద్యార్థులను ఉత్తమ ప్రగతి దిశగా నడిపించాలని ఉపాధ్యాయులకు సూచించారు.
అనంతరం కలెక్టర్ పాఠశాలలోని డిజిటల్ క్లాస్రూమ్లు, ప్రీ-ప్రైమరీ తరగతి గదులు, భోజనశాలను పరిశీలించారు.
ఈ కార్యక్రమంలో జిల్లా విద్యాశాఖ అధికారులు, రిసోర్స్ పర్సన్లు, శిక్షణ నిర్వాహకులు, అంతర్గాం, పాలకుర్తి, శ్రీరాంపూర్, ఓదెల, పెద్దపల్లి మండలాలకు చెందిన భౌతిక శాస్త్ర ఉపాధ్యాయులు పాల్గొన్నారు.
