◆ సీఈఐఆర్ పోర్టల్ ద్వారా బాధితుల చెంతకు మొబైల్స్
◆ రికవరీ మేళాలో పోలీసు సిబ్బందికి ఎస్పీ అభినందనలు
ప్రజానావ,ఉమ్మడి మహబూబ్ నగర్ బ్యూరో: బాధితులు పోగొట్టుకున్న, చోరీకి గురైన రూ.65 లక్షల విలువైన 236మొబైల్ ఫోన్లను పోలీసులు రికవరీ చేసి శుక్రవారం బాధితులకు అందజేశారు. వనపర్తి జిల్లా పోలీసు కార్యాలయంలో నిర్వహించిన ‘మొబైల్ రికవరీ మేళా’లో ఎస్పీ సునీతారెడ్డి పాల్గొని ఫోన్లను పంపిణీ చేశారు. ఈ సందర్భంగా ఎస్పీ మాట్లాడుతూ… సిసిఎస్ సీఐ అశోక్ కుమార్ నేతృత్వంలో 3 ప్రత్యేక బృందాలు ఏర్పాటు చేసి, తెలంగాణతో పాటు ఆంధ్రప్రదేశ్, కర్ణాటక, కేరళ, మహారాష్ట్ర, మధ్యప్రదేశ్ రాష్ట్రాల నుంచి నెల రోజుల్లో ఈ ఫోన్లను రికవరీ చేసినట్లు తెలిపారు. సీఈఐఆర్ పోర్టల్ ద్వారా సాంకేతికతను ఉపయోగించి ఈ ఏడాది మొత్తం 500 ఫోన్లను రికవరీ చేసి బాధితులకు అందించామన్నారు. ఫోన్లు పోగొట్టుకున్న వారు వెంటనే ceir.gov.in పోర్టల్లో లేదా సమీప పోలీస్ స్టేషన్లో ఫిర్యాదు చేయాలని సూచించారు. అనంతరం ఫోన్ల రికవరీలో ప్రతిభ కనబరిచిన సైబర్ వారియర్స్, టెక్నికల్ టీమ్ పోలీసు సిబ్బందికి ఎస్పీ క్యాష్ రివార్డులు అందజేసి అభినందించారు. ఈ కార్యక్రమంలో డిఎస్పీలు గిరిబాబు, బాలాజీ నాయక్, సీఐలు, పోలీసు సిబ్బంది పాల్గొన్నారు.
