అమెరికా పర్యటనకు అనుమతి నిరాకరణపై సీఎం రేవంత్ రెడ్డి తీవ్ర ఆగ్రహం

* రాజకీయ కారణాలతో తిరస్కరించడం తెలంగాణ పట్ల వివక్షే
* 4 కోట్ల తెలంగాణ ప్రజలను అవమానించడమే
* కేంద్ర వైఖరిని ముక్తకంఠంతో ఖండిస్తున్నాం
* ఫెడరల్ స్ఫూర్తికి విరుద్ధంగా కేంద్రం వ్యవహరిస్తోంది
* వచ్చే పార్లమెంట్ సమావేశాల్లో ఈ అంశాన్ని లేవనెత్తుతాం

హైదరాబాద్: తెలంగాణ అభివృద్ధి, పెట్టుబడుల ఆకర్షణ, టెక్నాలజీ ప్రమోషన్ లక్ష్యంగా చేపట్టిన తన అమెరికా పర్యటనకు కేంద్ర ప్రభుత్వం రాజకీయ కారణాలతో అనుమతి నిరాకరించడాన్ని ముఖ్యమంత్రి ఎ. రేవంత్ రెడ్డి తీవ్రంగా ఖండించారు. తెలంగాణ రైజింగ్ 2047 దార్శనికతలో భాగంగా రాష్ట్ర అభివృద్ధికి స్పష్టమైన లక్ష్యంతో చేపట్టిన పర్యటనను అడ్డుకోవడం తెలంగాణ పట్ల వివక్ష చూపడమేనని ఆయన ఆగ్రహం వ్యక్తం చేశారు.

డాక్టర్ బీఆర్ అంబేద్కర్ రాష్ట్ర సచివాలయంలో ఉప ముఖ్యమంత్రి మల్లు భట్టి విక్రమార్క, మంత్రులు ఉత్తమ్ కుమార్ రెడ్డి, తుమ్మల నాగేశ్వరరావు, ధనసరి అనసూయ సీతక్క, పొంగులేటి శ్రీనివాసరెడ్డితో పాటు ఎంపీలు, ఎమ్మెల్సీలు, ఎమ్మెల్యేలతో కలిసి సీఎం రేవంత్ రెడ్డి మీడియా సమావేశం నిర్వహించారు.

* పర్యటన వివరాలన్నీ కేంద్రానికి ముందే తెలిపాం:
అమెరికా పర్యటనకు సంబంధించి సమగ్ర వివరాలను కేంద్ర విదేశాంగ మంత్రిత్వ శాఖకు అందజేశామని సీఎం తెలిపారు. పర్యటనలో ఎలాంటి రహస్యాలు, దాపరికాలు లేవని స్పష్టం చేశారు.

“రాజకీయ కారణాలతో అనుమతి తిరస్కరిస్తున్నామని చెప్పడం 4 కోట్ల తెలంగాణ ప్రజలను అవమానించడమే. తెలంగాణ ప్రభుత్వం ఈ పరిణామాలను ముక్తకంఠంతో ఖండిస్తుంది. దీనిపై కేంద్ర ప్రభుత్వానికి తెలంగాణ తన నిరసనను తెలియజేస్తుంది” అని రేవంత్ రెడ్డి అన్నారు.

తెలంగాణ పట్ల చులకన భావం, చిన్నచూపు సరికాదని పేర్కొన్న ఆయన, రాజకీయ కారణాలతో ముఖ్యమంత్రి విదేశీ పర్యటనకు అనుమతి నిరాకరించడం దేశ ఫెడరల్ స్ఫూర్తికి పూర్తి విరుద్ధమన్నారు.

* కేంద్ర, రాష్ట్రాల మధ్య సత్సంబంధాలు అవసరం:
ఫెడరల్ వ్యవస్థలో ఇలాంటి ధోరణులు కేంద్ర, రాష్ట్ర ప్రభుత్వాల మధ్య సత్సంబంధాలను దెబ్బతీస్తాయని సీఎం వ్యాఖ్యానించారు. కేంద్ర, రాష్ట్ర ప్రభుత్వాల మధ్య సిద్ధాంతపరమైన విభేదాలు ఉండవచ్చని, అయితే పరస్పర సత్సంబంధాలు కొనసాగాల్సిన అవసరం ఉందన్నారు.అమెరికా పర్యటనకు అనుమతి నిరాకరణ అంశాన్ని వచ్చే పార్లమెంట్ సమావేశాల్లో లేవనెత్తుతామని స్పష్టం చేశారు.

* పెట్టుబడుల కోసమే అమెరికా పర్యటన:
పెట్టుబడులను ఆకర్షించడం, టెక్నాలజీ ప్రమోషన్‌లో భాగంగా ఈ ఏడాది నిర్వహించనున్న ఇన్వెస్ట్ తెలంగాణ సమ్మిట్లో విదేశీ సంస్థలను భాగస్వామ్యం చేయడానికి అమెరికా పర్యటనను ప్రణాళిక చేసినట్లు సీఎం వివరించారు.

“వైబ్రెంట్ గుజరాత్ పేరుతో పెట్టుబడుల కోసం గుజరాత్ ముఖ్యమంత్రి పర్యటనకు అనుమతించి, తెలంగాణ ముఖ్యమంత్రి పర్యటనకు ఎందుకు నిరాకరించారు?” అని ప్రశ్నించారు.తెలంగాణ రైజింగ్ 2047 లక్ష్యాలకు అనుగుణంగా, వికసిత్ భారత్ 2047 ఆలోచనలకు అనుగుణంగా రాష్ట్రం, దేశం ఆర్థికంగా అభివృద్ధి చెందాలనే లక్ష్యంతో విద్య, క్రీడలు, పెట్టుబడులు తదితర రంగాల్లో అవకాశాలను అన్వేషించేందుకు పర్యటన తలపెట్టామని చెప్పారు.

* ఇంగ్లండ్‌కు అనుమతి.. అమెరికాకు నిరాకరణ:
విదేశాంగ మంత్రిత్వ శాఖను సంప్రదించి విదేశీ పర్యటనలకు అనుమతులు తీసుకోవడం గతంలోనూ, ఇప్పుడూ జరుగుతున్న ప్రక్రియేనని సీఎం తెలిపారు. ఇంగ్లండ్ పర్యటనకు అనుమతించి, అమెరికా పర్యటనకు మాత్రం అనుమతి నిరాకరించారని ఆక్షేపించారు.

తన పర్యటనకు సంబంధించిన వివరాలు ఇవ్వలేదంటూ కొందరు చేస్తున్న ఆరోపణలు అవాస్తవమని తెలిపారు. విదేశీ పర్యటనకు క్లియరెన్స్ కోసం సమర్పించిన దరఖాస్తులో పర్యటన ఉద్దేశాలు, కార్యక్రమాల వివరాలను స్పష్టంగా పేర్కొన్నామని చెప్పారు.

రాయబార కార్యాలయాల పర్యవేక్షణలో అధికారిక పర్యటనలు

అధికారిక పర్యటనల సమయంలో ఆయా దేశాల్లోని భారత రాయబార కార్యాలయాలు పర్యటనలను పర్యవేక్షిస్తాయని సీఎం వివరించారు. సమావేశాల్లో రాయబార కార్యాలయ అధికారులు పాల్గొంటారని, చర్చించిన అంశాలపై కేంద్ర ప్రభుత్వానికి నివేదికలు అందజేస్తారని తెలిపారు.

విదేశాంగ మంత్రి గతంలో విదేశాంగ శాఖలో కార్యదర్శిగా పనిచేసినందున ఈ ప్రక్రియపై పూర్తి అవగాహన ఉందని సీఎం పేర్కొన్నారు.

విద్య, క్రీడలు, పెట్టుబడులే ప్రధాన లక్ష్యం

విద్య, క్రీడలు, పెట్టుబడుల కోసం అమెరికా పర్యటనను తలపెట్టామని సీఎం తెలిపారు. డిసెంబర్‌లో హైదరాబాద్‌లో నిర్వహించనున్న ఇన్వెస్ట్ తెలంగాణ సమ్మిట్‌లో పాల్గొనాల్సిందిగా విదేశీ సంస్థలను ఆహ్వానించడం, ప్రతిష్టాత్మకమైన విద్యా సంస్థలను హైదరాబాద్‌కు ఆహ్వానించడం పర్యటనలో ప్రధాన లక్ష్యాలుగా పేర్కొన్నారు.

ప్రపంచ ప్రఖ్యాత విశ్వవిద్యాలయాలతో భాగస్వామ్యాలు, విద్యా రంగంలో సహకారం, క్రీడా రంగంలో పెట్టుబడులు, పారిశ్రామిక అవకాశాలపై చర్చలు జరపాలని నిర్ణయించినట్లు తెలిపారు.

లండన్ విశ్వవిద్యాలయాలతో సానుకూల చర్చలు

లండన్ పర్యటనలో ఆక్స్‌ఫర్డ్ యూనివర్సిటీ, కేంబ్రిడ్జ్ యూనివర్సిటీ, యూనివర్సిటీ ఆఫ్ లండన్, లండన్ బిజినెస్ స్కూల్ ప్రతినిధులతో చర్చలు జరిపినట్లు సీఎం తెలిపారు.

చర్చలు సానుకూల వాతావరణంలో జరిగాయని, తెలంగాణలో కొన్ని స్వల్పకాలిక కోర్సులను ప్రారంభించే అంశాన్ని పరిశీలించేందుకు ఆయా సంస్థలు సుముఖత వ్యక్తం చేశాయని చెప్పారు. త్వరలో ఇందుకు సంబంధించిన ఒప్పందాలు చేసుకోనున్నట్లు వెల్లడించారు.

విదేశీ విద్యకు ఖర్చు తగ్గించడమే లక్ష్యం

తెలంగాణ విద్యార్థులు అమెరికా, యూకే విశ్వవిద్యాలయాల్లో చదువుకోవడానికి కోట్ల రూపాయలు ఖర్చు చేయాల్సి వస్తోందని సీఎం పేర్కొన్నారు. విదేశీ విద్యకు రాష్ట్ర ప్రభుత్వం స్కాలర్‌షిప్‌లను అందిస్తున్నప్పటికీ అది పూర్తిగా సరిపోవడం లేదన్నారు.

అందుకే ప్రపంచ స్థాయి విశ్వవిద్యాలయాలను హైదరాబాద్‌కు ఆహ్వానించి, రాష్ట్రంలోనే అత్యుత్తమ విద్యా అవకాశాలు అందుబాటులోకి తీసుకురావాలన్నది ప్రభుత్వ ఆలోచనగా వివరించారు.

2047 నాటికి 3 ట్రిలియన్ డాలర్ల ఆర్థిక శక్తిగా తెలంగాణ

2034 నాటికి 1 ట్రిలియన్ డాలర్లు, 2047 నాటికి 3 ట్రిలియన్ డాలర్ల ఆర్థిక శక్తిగా తెలంగాణను తీర్చిదిద్దాలన్న లక్ష్యంతో ప్రభుత్వం పనిచేస్తోందని సీఎం తెలిపారు.

ఈ లక్ష్య సాధన కోసం ప్రణాళికాబద్ధంగా పెట్టుబడులను ఆకర్షించేందుకు చేపట్టిన పర్యటనకు అనుమతి నిరాకరించడం 4 కోట్ల తెలంగాణ ప్రజలకు జరిగిన అవమానమని, ఇది ఆక్షేపణీయమని అన్నారు.

ఇన్వెస్ట్ తెలంగాణ సమ్మిట్‌కు సన్నాహాలు

డిసెంబర్‌లో నిర్వహించనున్న ఇన్వెస్ట్ తెలంగాణ సమ్మిట్‌లో విదేశీ సంస్థలు పాల్గొనేలా నాలుగైదు నెలల ముందుగానే ఆహ్వానాలు అందించాల్సి ఉంటుందని సీఎం తెలిపారు. సంస్థలకు తగిన సమయం ఇవ్వాల్సిన అవసరం ఉందన్నారు.“తెలంగాణ లక్ష్యాలను ఎవరూ ఆపలేరు. ఇన్వెస్ట్ తెలంగాణ సమ్మిట్ కోసం ఆహ్వానాలను అందించడానికి అధికారులను ఇప్పటికే పంపించాం” అని ముఖ్యమంత్రి రేవంత్ రెడ్డి స్పష్టం చేశారు.