* నీటి వినియోగ సామర్థ్యాన్ని పెంచే సాంకేతిక యూనిట్లతో వ్యవస్థను పునర్వ్యవస్థీకరించాలి
* చెరువుల పరిరక్షణకు ప్రత్యేక చిన్న నీటిపారుదల చట్టం తీసుకురావాలి
* వ్యవసాయ, రైతు సంక్షేమ కమిషన్కు సీఎం రేవంత్ రెడ్డి సూచనలు
హైదరాబాద్: రాష్ట్రంలో చిన్న నీటిపారుదల వ్యవస్థను ఆధునిక సాంకేతికతతో పునరుద్ధరించి, నీటి వినియోగ సామర్థ్యాన్ని పెంచేలా చర్యలు చేపట్టాలని వ్యవసాయ, రైతు సంక్షేమ కమిషన్ ప్రభుత్వానికి సూచించింది. చిన్న, పెద్ద నీటిపారుదల వనరులను అనుసంధానం చేస్తూ కమాండ్ ఏరియా ఆధారిత నిర్వహణ వ్యవస్థలను ఏర్పాటు చేయాలని సిఫారసు చేసింది.
తెలంగాణ వ్యవసాయ–రైతు సంక్షేమ కమిషన్ చైర్మన్ ఎం. కోదండ రెడ్డి నేతృత్వంలోని ప్రతినిధి బృందం సభ్యులు రాములు నాయక్, రాంరెడ్డి గోపాల్ రెడ్డి, గంగాధర్, ఎం. భవానీరెడ్డి ముఖ్యమంత్రి ఎ. రేవంత్ రెడ్డిని జూబ్లీహిల్స్లోని ఆయన నివాసంలో కలిసి నివేదికను అందజేశారు.
ఈ సందర్భంగా కమిషన్ సిఫారసులపై ముఖ్యమంత్రి వారితో చర్చించారు. పంటల మార్పిడి, ఉద్యానవన పంటల సాగు పెంపు, రైతు ఉత్పత్తిదారుల సంఘాల (FPOs) ఏర్పాటు వంటి అంశాలపై కమిషన్ మరింత దృష్టి సారించాలని సీఎం సూచించారు.
చిన్న నీటిపారుదల వ్యవస్థను పునర్వ్యవస్థీకరించాలి
రాష్ట్రంలో చిన్న నీటిపారుదల వ్యవస్థను మెరుగుపరిచేందుకు పలు కీలక సూచనలను కమిషన్ తన నివేదికలో పొందుపరిచింది. నీటి వినియోగ సామర్థ్యాన్ని పెంచేందుకు అవసరమైన సాంకేతిక యూనిట్లతో చిన్న నీటిపారుదల వ్యవస్థను తిరిగి ఏర్పాటు చేయాలని సూచించింది.
చిన్న, పెద్ద నీటిపారుదల వనరులను కలుపుతూ కమాండ్ ఏరియా ఆధారిత నిర్వహణ వ్యవస్థలు ఏర్పాటు చేయాలని సిఫారసు చేసింది. దీనివల్ల అందుబాటులో ఉన్న నీటి వనరులను సమర్థంగా వినియోగించడంతో పాటు వ్యవసాయానికి నీటి భద్రతను మెరుగుపరచవచ్చని పేర్కొంది.
చెరువుల పరిరక్షణకు ప్రత్యేక చట్టం
చెరువుల పరిరక్షణ కోసం ప్రత్యేకంగా చిన్న నీటిపారుదల చట్టాన్ని రూపొందించాలని కమిషన్ సూచించింది. చెరువుల ఫుల్ ట్యాంక్ లెవల్ (FTL) సరిహద్దులను తక్షణమే గుర్తించి, ఆక్రమణలను తొలగించి చెరువులను పరిరక్షించాలని కోరింది.
తెలంగాణలో నీటి భద్రత, వ్యవసాయ స్థిరీకరణ, గ్రామీణ ప్రజల జీవనోపాధుల అభివృద్ధికి చెరువుల పునరుద్ధరణ అత్యంత అవసరమని కమిషన్ స్పష్టం చేసింది. చెరువుల పునరుద్ధరణతో గ్రామీణ ప్రాంతాల్లో సాగునీటి లభ్యత పెరగడంతో పాటు భూగర్భ జలాల పరిరక్షణకు కూడా దోహదపడుతుందని పేర్కొంది.
రైతు కమిషన్ పనితీరుపై సీఎం సంతృప్తి
గత రెండేళ్ల కాలంలో రైతు కమిషన్ చేపట్టిన కార్యక్రమాలు, ప్రభుత్వానికి అందించిన సూచనలు, సిఫారసులను ప్రతినిధి బృందం ముఖ్యమంత్రికి వివరించింది.
రైతుల సంక్షేమం, వ్యవసాయ రంగ అభివృద్ధికి కమిషన్ చేస్తున్న కృషిపై ముఖ్యమంత్రి రేవంత్ రెడ్డి సంతృప్తి వ్యక్తం చేశారు. వ్యవసాయ రంగాన్ని మరింత స్థిరీకరించేందుకు, రైతుల ఆదాయ అవకాశాలను పెంచేందుకు కమిషన్ తన సూచనలు, అధ్యయనాలను కొనసాగించాలని ఆయన సూచించారు.
